สณฺหสุขุมอณุรชสทิสา วาลุกา มุฏฺฐินา คหิตคหิตา องฺคุลนฺตริเกหิ ปคฺฆรติ ปสฺสวติ
นตฺถานมุปคจฺฉติ เอวเมว โข มหาราช สมฺปฏิจฺฉนตฺถํ สมาคจฺฉนฺตานํ ทฺวินฺนํ เสลานํ
สมฺปหาเรน ปาสาณโต ปปฺปฏิกา ภิชฺชิตฺวา เยน วา เตน วา ปตนฺตี ภควโต ปาเท
ปติตา ฯ ยถา วา ปน มหาราช กพโล มุเขน คหิโต อิเธกจฺจสฺส มุขโต มุจฺจิตฺวา
ปคฺฆรติ ปสฺสวติ นตฺถานมุปคจฺฉติ เอวเมว โข มหาราช สมฺปฏิจฺฉนตฺถํ สามคจฺฉนฺตานํ
ทฺวินฺนํ เสลานํ สมฺปหาเรน ปาสาณโต ปปฺปฏิกา ภิชฺชิตฺวา เยน วา เตน วา ปตนฺตี
ภควโต ปาเท ปติตาติ ฯ โหตุ ภนฺเต นาคเสน เสเลหิ ปาสาโณ สมฺปฏิจฺฉิโต อถ
ปปฺปฏิกายปิ อปจิติ กาตพฺพา ยเถว มหาปฐวิยาติ ฯ ทฺวาทส อิเม มหาราช อปจิตึ
น กโรนฺติ ฯ กตเม ทฺวาทส ฯ รตฺโต ราควเสน อปจิตึ น กโรติ ทุฏฺโฐ โทสวเสน
อปจิตึ น กโรติ มุฬฺโห โมหวเสน กุปฺปิโต มานวเสน นิคฺคุโณ อวิเสสตาย
อติถทฺโธ อนิเสธนตาย หีโน หีนสภาวตาย วจนกาโร อนิสฺสรตาย อจาโค กทริยตาย
ทุกฺขิโต ตํ ทุกฺขาปนตาย ลุทฺโธ โลภาภิภูเตน อายูหิโต อนตฺถสาธเนน อปจิตึ น
กโรติ ฯ อิเม โข มหาราช ทฺวาทส อปจิตึ กโรนิติ ฯ ยทิ ปน มหาราช สา
ปปฺปฏิกา ปาสาณโต วิสุํ น ภเวยฺย ตมฺปิ เต เสลา ปาสาณปปฺปฏิกํ อุปฺปติตฺวา
คณฺเหยฺยุํ ฯ เอสา จ ปน มหาราช ปปฺปฏิกา น ภุมฺมฏฺฐา น อากาสฏฺฐา
ปาสาณสมฺปหารเวเคน ภิชฺชิตฺวา อนิมิตฺตกตทิสา เยน วา เตน วา ปตมานา ภควโต
ปาเท ปติตา ฯ ยถา วา ปน มหาราช วาตมณฺฑลิกาย อุกฺขิตฺตํ ปุราณปณฺณํ
อนิมิตฺตกตทิสํ เยน วา เตน วา ปติตํ เอวเมว โข มหาราช เอสา ปปฺปฏิกา น
ภุมฺมฏฺฐา น อากาสฏฺฐา ปาสาณสมฺปหารเวเคน ภิชฺชิตฺวา อนิมิตฺตกตทิสา เยน วา
เตน วา ปตมานา ภควโต ปาเท ปติตา ฯ อปิจ มหาราช อกตญฺญุสฺส กทริยสฺส
เทวทตฺตสฺส ทุกฺขานุภวนตาย สา ปปฺปฏิกา ภควโต ปาเท ปติตาติ ฯ สาธุ ภนฺเต
นาคเสน เอวเมตํ สมฺปฏิจฺฉามีติ

ภควโต ปาทปปฺปฏิกปติตปญฺโห ฉฏฺโฐ ฯ

ภนฺเต นาคเสน ภาสิตํ เจตํ ภควตา
คาถาภิคีตํ เม อโภชเนยฺยํ
สมฺปสฺสสตํ พฺราหฺมณ เสน ธมฺโม
คาถาภิคีตํ ปนุทนฺติ พุทฺธา